ប្រែសម្រួល៖ រតនា

ហាណូយ៖ លោក To Lam ប្រធានាធិបតីដែលទើបនឹងតែងតាំងរបស់វៀតណាមនឹងធ្វើទស្សនកិច្ចផ្លូវរដ្ឋរយៈពេលបីថ្ងៃដើម្បីស្តាកិច្ចសហប្រតិបត្តិការសេដ្ឋកិច្ច និងការតភ្ជាប់ផ្លូវដែក។

នេះគឺជាការធ្វើដំណើរក្រៅប្រទេសជាលើកដំបូងរបស់លោក Lam ចាប់តាំងពីគាត់បានក្លាយជាប្រធានបក្សកុម្មុយនីស្តកាលពីដើមខែនេះ។

នៅក្នុងដំណើរទស្សនកិច្ចនេះ លោកនឹងជួបជាមួយប្រធានាធិបតីចិន Xi Jinping ដោយរំពឹងថានឹងស្វែងរកទីផ្សារសម្រាប់ផលិតផលកសិកម្មវៀតណាម និងការវិនិយោគក្នុងកម្រឹតខ្ពស់។

រួមជាមួយនិងការពន្លឿនផែនការសាងសង់ខ្សែរថភ្លើងល្បឿនលឿនដែលតភ្ជាប់ប្រទេសចិនទៅកាន់ទីក្រុងហាណូយ និងទីក្រុងកំពង់ផែសំខាន់ៗរបស់វៀតណាម។

វៀតណាមគ្រោងនឹងបញ្ចប់គម្រោងផ្លូវដែកល្បឿនលឿនចំនួនពីរនៅឆ្នាំ ២០៣០ ខណៈដែលប្រទេសនេះសម្លឹងមើលលើការធ្វើទំនើបកម្មបណ្តាញដឹកជញ្ជូនដ៏ចំណាស់របស់ខ្លួន និងជួយសម្រួលដល់ពាណិជ្ជកម្មជាមួយប្រទេសជិតខាងនៅភាគខាងជើងរបស់ប្រទេស។

• សារៈសំខាន់នៃដំណើរទស្សនកិច្ច

លោក Lam បាន​ស្បថ​ចូល​កាន់​តំណែង​ជា​ប្រធានាធិបតី​វៀតណាម​កាល​ពី​ខែ​ឧសភា បន្ទាប់​ពី​លោក​បាន​ទៅ​បំពេញ​ទស្សនកិច្ច​នៅ​ប្រទេស​ឡាវ និង​កម្ពុជា។

ប៉ុន្តែ​ចិន​គឺជា​ដំណើរ​ទស្សនកិច្ច​លើក​ដំបូង​របស់​បុរស​វ័យ​៦៦​ឆ្នាំរូបនេះ​នៅ​បរទេស​ក្នុងកម្រឹត​ទីមួយ​ក្នុង​នាម​ជា​ប្រធាន​រដ្ឋ និង​ជា​អគ្គលេខាធិការ​បក្សបក្សកុម្មុយនីស្ត។

គណបក្ស​នេះ​បាន​បាត់​បង់​ប្រធាន​មុន​របស់​ខ្លួន​កាលពី​ខែ​មុន​នៅ​ពេល​ដែល​មេដឹកនាំចាស់ Nguyen Phu Trong ដែលបាន​ស្លាប់​ដោយសារ​ជំងឺ។

សាស្ត្រាចារ្យផ្នែកនយោបាយ និងទំនាក់ទំនងអន្តរជាតិនៃសាកលវិទ្យាល័យ VinUniversity បណ្ឌិត Hai Hong Nguyen មានប្រសាសន៍ថា “ដំណើរទស្សនកិច្ចនេះគឺជានិមិត្តរូបមួយសំខាន់ខ្លាំងណាស់។

“ប្រធានាធិបតី Lam ចង់ផ្ញើសារថា លោកចង់ដើរតាមកេរដំណែលរបស់លោក Trong ដែលបានបង្កើតមូលដ្ឋានគ្រឹះជាយុទ្ធសាស្ត្រដ៏សំខាន់សម្រាប់ទំនាក់ទំនងវៀតណាមជាមួយនិងចិន។

លោក Lam នឹងជំរុញការអនុវត្តកិច្ចព្រមព្រៀងសំខាន់ៗដែលលោក Trong អ្នកស្នងតំណែងមុនបានចុះហត្ថលេខានៅក្នុងអំឡុងដំណើរទស្សនកិច្ចរបស់លោក Xi ទៅកាន់ទីក្រុងហាណូយកាលពីខែធ្នូកន្លងទៅ ជាពិសេសកិច្ចព្រមព្រៀងដើម្បីកសាង “សហគមន៍វៀតណាម-ចិនជាមួយនឹងអនាគតរួមគ្នា”។

នៅក្នុង​ដំណើរ​ទស្សនកិច្ច​របស់​លោក Xi វៀតណាម និង​ចិន​បាន​ព្រមព្រៀង​ពង្រឹង​កិច្ចសហប្រតិបត្តិការ​លើ​វិស័យ​មួយ​ចំនួន​ដូច​ជា​ការ​ទុក​ចិត្ត​ផ្នែក​នយោបាយ សន្តិសុខ និង​ការពារ​ជាតិ កិច្ច​សហការ​គ្នា​ក្នុង​យន្តការ​ពហុភាគី និង​គ្រប់គ្រង​ជម្លោះ​បាន​ល្អ​ប្រសើរ។

• អំណាចនយោបាយលោកLAM

អំណាចនយោបាយនៅវៀតណាមត្រូវបានចែករំលែកជាប្រពៃណីក្នុងចំណោមសសរស្តម្ភកំពូលទាំងបួនគឺប្រធានាធិបតី និងនាយករដ្ឋមន្ត្រីនៃប្រទេស អគ្គលេខាធិការបក្សកុម្មុយនិស្ត និងប្រធានរដ្ឋសភា។

លោក Lam កាន់កាប់តំណែងពីរក្នុងចំណោមមុខតំណែងទាំងបួនរួមទាំងយោធាជាន់ខ្ពស់បំផុតរបស់ប្រទេសក្នុងនាមជាលេខានៃគណៈកម្មាធិការយោធាមជ្ឈិម ដែលជាមុខតំណែងដែលលោកកាន់កាប់ក្នុងនាមជាប្រធានបក្ស។

ក្នុងនាមជាអតីត:ទាហានជើងចាស់អស់ជាច្រើនទសវត្សរ៍ទទួលបន្ទុកផ្នែកសន្តិសុខសាធារណៈរបស់វៀតណាម លោក Lam បានឡើងកាន់តំណែងយ៉ាងលឿនក្នុងចំណោមឥស្សរជននយោបាយវៀតណាម។ គាត់​បាន​ចេញពី​មេ​ប៉ូលិស​​ទៅ​ជា​ប្រធានាធិបតី ហើយ​បាន​បន្ថែមតំណែងជា​អគ្គលេខាធិការ​បក្ស​នៅ​ក្នុង​រយៈពេល​តិច​ជាង​បី​ខែ។

មុខមាត់ថ្មីក្នុងការដឹកនាំជំនាន់ក្រោយរបស់វៀតណាម រួមទាំងការចូលរួមដ៏លេចធ្លោបំផុតរបស់លោកក្នុងការអនុវត្តគោលនយោបាយការបរទេសនៅក្នុងខែមិថុនា គឺនៅចំពេលដែលលោកធ្វើជាម្ចាស់ផ្ទះទទួលប្រធានាធិបតីរុស្ស៊ីលោក Vladimir Putin នៅទីក្រុងហាណូយ។ រុស្សីក៏មានទំនាក់ទំនងជាប្រវត្តិសាស្ត្រជាមួយវៀតណាមផងដែរ។

• ចំណងសេដ្ឋកិច្ចដ៏រឹងមាំ

លោក Bui Thanh Son រដ្ឋមន្ត្រីការបរទេសវៀតណាម បានប្រាប់សារព័ត៌មានក្នុងស្រុកថា ដំណើរទស្សនកិច្ចផ្លូវរដ្ឋទៅកាន់ទីក្រុងប៉េកាំងលើកនេះ នឹងក្លាយជាព្រឹត្តិការណ៍ដ៏សំខាន់មួយទៀត នៅសម័យកាលថ្មីលើទំនាក់ទំនងរវាងវៀតណាមនិងចិន។

អ្នកវិភាគនិយាយថា គោលបំណងសំខាន់នៃដំណើរទស្សនកិច្ចនេះគឺដើម្បីបង្កើតទំនាក់ទំនងផ្ទាល់ខ្លួនរបស់មេដឹកនាំវៀតណាមថ្មីជាមួយសមភាគីចិន។

“វៀតណាមចាត់ទុកទំនាក់ទំនងចិន-វៀតណាមជាជម្រើសយុទ្ធសាស្ត្រ។ ប្រទេសទាំងពីរមានព្រំដែនតែមួយពួកគេមានទិដ្ឋភាពស្រដៀងគ្នាជាច្រើន រួមទាំងរចនាសម្ព័ន្ធនៃប្រព័ន្ធនយោបាយផងដែរ។

លោកក៏រំពឹងថា លោក Lam នឹងពិភាក្សាអំពីឱនភាពពាណិជ្ជកម្មរបស់វៀតណាមជាមួយលោក Xi និងជំរុញឲ្យមានទំហំពាណិជ្ជកម្មប្រកបទៅដោយតុល្យភាពបន្ថែមទៀតរវាងប្រទេសទាំងពីរ។

ប្រទេសចិនគឺជាដៃគូពាណិជ្ជកម្មដ៏ធំបំផុតរបស់វៀតណាមក្នុងចំនួនទឹកប្រាក់ ១៧៣.៣ ពាន់លានដុល្លារកាលពីឆ្នាំមុន។ការនាំចេញរបស់វៀតណាមទៅកាន់ប្រទេសចិនគឺនៅទាបជាងពាក់កណ្តាលនៃតម្លៃនាំចូល ដែលបង្ហាញពីការពឹងផ្អែកយ៉ាងខ្លាំងរបស់ខ្លួនលើទំនិញរបស់ចិន ជាពិសេសវត្ថុធាតុដើម។

• ជម្លោះដ៏តានតឹងនៅសមុទ្រចិនខាងត្បូង

ដំណើរទស្សនកិច្ចនាពេលខាងមុខរបស់លោក Lam ធ្វើឡើងនៅចំពេលដែលសភាពការណ៏មានភាពតានតឹងកើនឡើងនៅសមុទ្រចិនខាងត្បូង ជាកន្លែងដែលភាគីទាំងពីរបានជាប់គាំងនៅក្នុងជម្លោះទឹកដីដ៏រ៉ាំរ៉ៃដោះមិនចេញ។

ឆ្នាំនេះ គឺជាខួបលើកទី ១០ នៃការតវ៉ាប្រឆាំងចិនដ៏ធំនៅក្នុងប្រទេសវៀតណាម បន្ទាប់ពីក្រុងប៉េកាំងបានដំឡើងស្ថានីយខួងយកប្រេងចេញពីឆ្នេរសមុទ្រវៀតណាម ក្បែរកោះដែលមានជម្លោះ។

ភាព​តានតឹង​ទ្វេភាគី​នៅ​សមុទ្រ​ចិន​ខាង​ត្បូង​ត្រូវ​បាន​ទប់​ស្កាត់​បាន​យ៉ាង​ល្អ​តាំង​ពី​ពេល​នោះ​មក។

អ្នកសង្កេតការណ៍បានកត់សម្គាល់ថា នៅក្នុងរយៈពេលពីរឆ្នាំចុងក្រោយនេះ វៀតណាមបានបង្កើនការសាងសង់នៅទីនោះ ដោយមិនមានការជំទាស់ ឬការជ្រៀតជ្រែកពីប្រទេសចិនឡើយ។

ការពិភាក្សាសំខាន់មួយទៀតនៅទីក្រុងប៉េកាំងនៅក្នុងអំឡុងដំណើរទស្សនកិច្ចរបស់លោក Lam នឹងត្រូវលើកយកបញ្ហាគ្រប់គ្រងជម្លោះនៅដែនសមុទ្រចិន​ខាង​ត្បូងមកពិភាក្សាផងដែរ។

• ការធ្វើឲ្យមានតុល្យភាព

ក្រុមអ្នកសង្កេតការណ៍បាននិយាយថា នៅចំពេលមានការប្រកួតប្រជែងរវាងចិន និងសហរដ្ឋអាមេរិក វៀតណាមចង់រក្សាតុល្យភាពនៅក្នុងទំនាក់ទំនងជាមួយប្រទេសទាំងពីរ។

“វៀតណាមចាត់ទុកសហរដ្ឋអាមេរិកជាអាទិភាពយុទ្ធសាស្ត្រ។ ការអភិវឌ្ឍរបស់វៀតណាមពិតជាត្រូវការបរិយាកាសសន្តិភាព និងសន្តិសុខខ្លាំងណាស់”។

ដំណើរ​ទស្សនកិច្ច​របស់​លោក Lam នឹង​ត្រូវ​បាន​សាធារណជន​ក្នុង​ស្រុកតាមដានយ៉ាងដិតដល់ដោយសារតែមាន​ការ​មិន​ទុក​ចិត្តប្រទេស​ចិនដែលបានបង្កឲ្យមាន​សង្គ្រាម​រាប់​សតវត្សរ៍កន្លងមក។

“ទំនាក់ទំនង​ជាមួយ​ប្រទេស​ចិន​គឺជា​អាទិភាព​ទីមួយ និង​សំខាន់​បំផុត​សម្រាប់វៀតណាម។ យើងចង់រក្សាចំណងមិត្តភាព” លោក Tran Tam Giap ពលរដ្ឋវៀតណាមរស់នៅទីក្រុងហាណូយបាននិយាយយ៉ាងដូច្នេះ។

ប្រជាជនវៀតណាមជាច្រើននិយាយថា យើងមិនខ្លាចចិនទេ។ ប្រសិន​បើ​មានការ​ប្រយុទ្ធគ្នា​យើង​បាន​ត្រៀម​ខ្លួន​ជា​ស្រេច​ដើម្បី​ប្រយុទ្ធ​។ ប៉ុន្តែវាបង្ហាញពីការខូចខាតជាច្រើនជាងសន្តិភាពហើយ​ស្ថិរភាព​គឺ​ជា​ផលប្រយោជន៍​ដ៏​ល្អ​បំផុត​របស់​យើង៕

ប្រភព៖ CNA/dn